Samantha : ప్రముఖ నటి సమంతకు సంబంధించిన ఒక ఆసక్తికరమైన పాత వీడియో ప్రస్తుతం సోషల్ మీడియాలో విపరీతంగా వైరల్ అవుతోంది. సుమారు 12 ఏళ్ల క్రితం, అంటే 2014లో సమంత ఒక ప్రముఖ టెలివిజన్ టాక్ షోకు అతిథిగా హాజరయ్యారు. ఆ కార్యక్రమంలో భాగంగా ముఖ కవళికలను బట్టి జాతకం చెప్పే (ఫేస్ రీడింగ్) ఓ జ్యోతిషుడు సమంత భవిష్యత్తు గురించి పలు ఆసక్తికర విషయాలను వెల్లడించారు. ముఖ్యంగా సమంతకు తొలి సంతానంగా మగబిడ్డ జన్మిస్తాడని ఆయన అప్పట్లోనే జోస్యం చెప్పారు. తాజాగా ఆ షోకు సంబంధించిన వీడియో క్లిప్ నెట్టింట మళ్లీ ప్రత్యక్షం కావడంతో అభిమానులు, నెటిజన్లు దానిని విస్తృతంగా షేర్ చేస్తూ ఆసక్తికరంగా చర్చించుకుంటున్నారు.

అమ్మాయి కావాలంటూ సమంత సరదా స్పందన
జ్యోతిషుడు చెప్పిన ఈ జోస్యంపై అప్పట్లో సమంత ఎంతో చలాకీగా, సరదాగా స్పందించిన తీరు అందరినీ ఆకట్టుకుంటోంది. తనకు మొదటి సంతానంగా అబ్బాయి పుడతాడని జ్యోతిషుడు చెప్పగానే, సమంత వెంటనే స్పందిస్తూ తనకు మొదట ఆడపిల్ల పుట్టాలని కోరుకుంటున్నట్లు మనసులోని మాటను బయటపెట్టారు. అంతటితో ఆగకుండా, “నా ముఖాన్ని మరోసారి సరిగ్గా చూసి అమ్మాయి పుడుతుందని చెప్పండి” అంటూ జ్యోతిషుడిని సరదాగా కోరారు. సమంత క్యూట్ ఎక్స్ప్రెషన్స్, ఆమె మాట్లాడిన తీరుతో కూడిన ఈ త్రోబ్యాక్ వీడియో ప్రస్తుతం అభిమానులను విశేషంగా అలరిస్తోంది.