OM Movie Twitter Review: కోలీవుడ్ స్టార్ హీరో ధనుష్, మలయాళ మెగాస్టార్ మమ్ముట్టి, లేడీ పవర్స్టార్ సాయి పల్లవి, యంగ్ బ్యూటీ శ్రీలీల ప్రధాన పాత్రల్లో నటించిన భారీ మల్టీస్టారర్ చిత్రం ‘ఓం: ఆపరేషన్ మోల్’ . రాజ్కుమార్ పెరియస్వామి దర్శకత్వం వహించిన ఈ సినిమా, నవంబర్ 20వ తేదీన తెలుగు, తమిళ, మలయాళ భాషల్లో ప్రపంచవ్యాప్తంగా ఘనంగా విడుదలైంది. వుండెర్బార్ ఫిల్మ్స్, ఆర్ టేక్ స్టూడియోస్ బ్యానర్లపై శ్రద్ధ అగర్వాల్, ధనుష్, అజ్మత్ జగ్మంగ్లు ఈ చిత్రాన్ని ప్రతిష్ఠాత్మకంగా నిర్మించారు. ఇందులో నసిరుద్దీన్ షా, ఇంద్రన్స్, ధీన, లల్లూ, రేణు దేశాయ్ తదితరులు ఇతర కీలక పాత్రల్లో మెరిశారు.
ఇప్పటికే విడుదలైన టీజర్, ట్రైలర్లు మరియు వినూత్న ప్రమోషనల్ కార్యక్రమాలతో ‘ఓం’ సినిమాపై ప్రేక్షకుల్లో భారీ అంచనాలు నెలకొన్నాయి. యువ సంగీత సంచలనం సాయి అభ్యాంకర్ ఈ చిత్రానికి సంగీతం అందించగా, కే ఈజిల్ అరసు సినిమాటోగ్రఫీ, ఆర్ కలైవణ్ణన్ ఎడిటింగ్ బాధ్యతలు నిర్వర్తించారు. క్రేజీ కాంబినేషన్లో తెరకెక్కిన ఈ చిత్రం థియేటర్లలోకి రావడంతో, సినిమా చూసిన ప్రేక్షకులు సోషల్ మీడియా వేదికగా తమ అభిప్రాయాలను పంచుకుంటున్నారు.
‘ఓమ్’ గంధపు చెక్కల స్మగ్లింగ్ నెట్వర్క్, అక్రమ దందా ప్రపంచవ్యాప్తంగా ఎలా సాగుతుందో కళ్లకు కట్టినట్టు చూపించే పూర్తిస్థాయి ఇన్వెస్టిగేషన్ థ్రిల్లర్ అని ఓ నెటిజన్ అభిప్రాయపడ్డారు. సినిమాలో కేవలం రెండు యాక్షన్ బ్లాక్స్ మాత్రమే ఉన్నప్పటికీ, బలమైన పాత్రలతో నటనకు ఎక్కువ ప్రాధాన్యత ఉందని, ముఖ్యంగా ధనుష్ రాజా నటన అద్భుతంగా ఉందని కొనియాడారు.
ట్రైలర్లాగే ఈ సినిమా కూడా ఏమాత్రం ఆకట్టుకోలేకపోయింది. ‘రామాయణ’ తర్వాత సాయి పల్లవి నటన మరోసారి మెప్పించినా, సినిమాలో ప్లస్ల కంటే మైనస్లే ఎక్కువగా ఉన్నాయి. గంధపు చెక్కల స్మగ్లింగ్ నేపథ్యంలో వచ్చే రొటీన్, ఊహించదగిన కథ, ఆకట్టుకోని ధనుష్ అండర్ కవర్ ఆఫీసర్ పాత్ర నిరాశపరిచాయి. దీనికి తోడు సాయి అభయంకర్ అందించిన బీజీఎం చాలా లౌడ్గా ఉండటం, సౌండ్ మిక్సింగ్ బాగాలేకపోవడం సినిమాకు పెద్ద మైనస్గా మారాయని ఓ నెటిజన్ అభిప్రాయపడ్డారు.
ఆంధ్రాలో మొదలై తిరువన్నమలై వరకు సాగే ఈ ఆంధ్రా-తమిళనాడు సరిహద్దు కథ చాలా ఆసక్తికరంగా ఉందని ఓ నెటిజన్ కామెంట్ చేశాడు. ముఖ్యంగా ధనుష్ టైటిల్ కార్డ్, ఎంట్రీ ఫ్యాన్స్కు మంచి వైబ్ ఇస్తే, పోలీస్ లుక్లో సాయి పల్లవి ఇంట్రడక్షన్ అదరగొట్టిందని తెలిపాడు. వీటన్నింటికీ తోడు సాయి అభయంకర్ అందించిన మ్యూజిక్ వేరే లెవెల్లో ఉందని ప్రశంసించాడు.
ఈ సినిమా ఫస్టాఫ్ చాలా నెమ్మదిగా, పేలవమైన స్క్రీన్ప్లేతో నిరాశపరిచిందని, అయితే దాంతో పోలిస్తే సెకండాఫ్ కొంచెం పర్వాలేదనిపించిందని ఓ నెటిజన్ అభిప్రాయపడ్డాడు. మొత్తం మీద ఇది ఒక యావరేజ్ సినిమా మాత్రమేనని, థియేటర్కు వెళ్లి చూడటం టైమ్ వేస్ట్ అన్న ఫీలింగ్ కలిగిందని కామెంట్ చేశాడు.
సెన్సార్ బోర్డు ప్రివ్యూలో ఈ సినిమా చూసిన దుబాయ్ క్రిటిక్, ఇది ఒక ‘పైసా వసూలు’ మూవీ అంటూ పాజిటివ్ రివ్యూ ఇచ్చారు. స్టార్ హీరో, హీరోయిన్లతో డ్రీమ్ కాస్టింగ్ ఉందని, ముఖ్యంగా ధనుష్, మమ్ముట్టి స్పెషల్ ఎట్రాక్షన్గా నిలవడమే కాకుండా తమ నటనతో అదరగొట్టారని ప్రశంసించారు. సినిమా క్లైమాక్స్ అదిరిపోయిందని, తప్పకుండా ఒక్కసారి చూడదగ్గ చిత్రమని ఆయన అభిప్రాయపడ్డారు.
ఈ సినిమాలోని ధనుష్ ఎంట్రీ సీన్తో పాటు 5 నిమిషాల పాటు సాగే సింగిల్ షాట్ రకరకాల అనుభూతులను కలిగించిందని, కెమెరా వర్క్ అద్భుతంగా ఉందని ఓ నెటిజన్ కామెంట్ చేశాడు. ఇందులో ధనుష్ చాలా హ్యాండ్సమ్గా కనిపించాడని, మమ్ముట్టి స్క్రీన్ ప్రెజెన్స్ గ్రేట్గా ఉందని ప్రశంసించాడు.